هذي أول مشاركه لي وأتمنى تنال الاعجاب ومايرزعونها بالماصله
الناس ياجماعة الربع لين جاء الصيف ...عفوا أقصد طباخ الأوادم تلقاهم مغير طايرتن بوهتهم من كثر
مايفكرون وين يسافرون علشان يبردون جلودهم هاللي شوتها القوايل وطلعت مقلقل في مدينتنا الحبيبه الرياض
وإنا ياخلاف من يجي الصيف ونفكر وأبشركم مابرحنا نفكر...نفتح موضوع السفر مع الوالد العزيزالاتلقاه
يدفدف لك هالمكيف الصحراوي اللي تسنه( وايت شفط )من صوت الرجرجه تمهيدا لقضاء الاجازه في حوشنا الحبيب
وأمي الله يهديها من يوم يطري على بالنا نحتسيلها بهالسالفه يقالنا بتفزع الا وتجيك غبرة ذيك الزولية
الخضراءاللي شاريها أبوي من شريطية الحراج ومن يوم تشوفها اعرف انه لاأمل للسفريه حتى لو لبيروت
اللي أطقع شنب صار يروح لها صارت مثل البطحاء وملجأ لذوي الدخل المحدود أجل قد خبرتوا واحد بيسافر وماخذ
معه كرتون نواشف المهم مالكم بالسيره ومن يوم تفرش الوالده هالزولية الخضراءتتخيل انك قاعد بغابات
استوائيه ماغير تنطل عمرك عليها فهالقوايل مرتن يهفك هواء المكيف الصحراوي وتقول يالله براد الجنه ومرتن
تجيك لفحتن من جونا العليل تسلخ حواجبك من حرورتها كله كوم وهالضواطير اللي تلقاك منسدح بأمان الله
الاوتحس به يتدربى على ظهرك كنه من تماسيح أفريقيا ناقصه حراشف بس هذا زين اذا ماصرت قاعد تشرب لك
شاهي ولا نعناع مع كراث من سوايا الوالده والا على طاريهم صز لين قالوا ثقافة السعوديين ماتتغير حر وقرف
ولهيب القوايل ويشربون حار ليش ليييييش؟؟؟؟ بفهم مايحسون أنا أتوقع خلايا الاحساس فينا لو تشرب
بارد تستنكر على طول غثيان وصداع هذا اذا ما قالوا فيك الجمره الخبيثه ماتعودوا عادي.........
لا .........والكراث ودي اعرف وش الرابط بين الكراث والشاهي تهقونه تقليد الاجانب يحطون
زيتونه بالكاس وأتوقع فهمناها غلط وحرة فيهم قلبناها كراث أجل نصير امعات .نرجع لموضوعنا بجنب
الضواطيرفجأه تقعد تطعم شي فالبياله وتتخيل وقتها انك تشرب ديتول ولا ملمع قزاز وش السالفه أثاريه قعس قضى
نحبه فبيالتك ومالقى آمن من ذا المكان وهذ غير الحشرات من كل بحر قطره وأقسم بالله بعضها ماشفته الابحوشنا
شين يزحف وشين يطير وشي يناقز وشين كنه جيب تطعيس المهم مرتن من المراريركنت مستلقيه على هالزولية
الخضراء وأشطح بفكري وأنا أقولب بهاالعيينات فها السماء مير وآخذ لي غطتنون قصيرتون بعد مادلوخ
هواء المكيف بسحيلة مخي مير وأحلم هاك الحلم وتسني بذاك الكاهن اللي لابسن له غضارة على راسه يقول هاه
يابنت راضيتن بهاالاشيقر رجلن لتس واقوله وانا مبققتن عيوني بالرجال ولاانلام كود انها مثل فتحات
الازارير ماأدقق فالشي الا لين حطيت لها اطناب :ايه يابعدي راضيتن به قال ايه أجل عليها ياللي ماتضيع
؟؟؟؟؟؟؟؟؟وش دخلها شكلي قمت اخوره بس حلمي وانا حره ويوم قربت خشتي علشان يقبلني
الا وذيك الرجفه اللي شدت منها عضلات وجهي وأبوي يقول فطيمه فطيمه وجهن يوجعتس
وشفيتس منبطتن فيذا يالعنز قومي قامت عصبتس شوي لنا شاهي أنا وعمتس ...........الله يهديه ابوي مدلعني
بقوه بس احيانا يمزح مزح ثقيل بس أهم شي حب الوطن وأقوم وأنا أعرج وأسمع صوت طقطقه
دريت أن أبوي حل صواميل ساقي بس معليش كلش يهون علشان الأشيقر وأدخل المطبخ وأولع البريق وأتذكر هاك
الحلم ويطقني ذاك الهاجوس ايه ..ايه.. يابنت والله موب تسنه فاتتس رالي الزواج ؟؟؟؟؟؟؟؟؟؟؟؟؟؟؟؟تسمع بقطار
الزواج قلت مابدهاش تلاحقي عمرتس وافتكي من ذا البيت اللي أصغر واحد فيه ماقدر طخامة هالوجه مير وتلمع
لمبة راسي وترى من زمان مفصول الكهرب عنه وأذكر هالعم اللي جاي وقلت فرصتس يابنت تميلحي كود انه
ياخذتس لحدا عياله هالكمخ صح انهم مايفرقون عن تقاطيع كونداليزا بنت محيسن حقت امريكا الا انهم قللين صح
ويفرحون بطاري العرس ومير واطمر للكنيسه ......متأثره بالحلم وافتح الدولاب وأول مره أكتشف ان ذوقي خياس
نعنبو بليس عمركم شفتوا تنوره صفراء منقطة بأحمر كني من ذا النقاء فغبيراء
يتبع...يتبع .......يتبع